Óskemende joǵalyp ketken jasóspirim tabyldy
ÓSKEMEN. QazAqparat – Óskemendik polıtseıler joǵalyp ketken jasóspirimdi taýyp aldy, dep habarlaıdy QazAqparat tilshisi.
Shyǵys Qazaqstan oblystyq Polıtsııa departamenti baspasóz qyzmetiniń málimetine súıensek, 13 qańtarda saǵat 10.00 shamasynda «102» arnasyna Jasóspirimder úıiniń qyzmetkerleri habarlasyp, sol kúni saǵat 09.00-de 17 jastaǵy balanyń syrtqa shyǵyp, áli kúnge deıin oralmaǵandyǵy týraly aıtty.
Polıtsııa qyzmetkerleri jasóspirimniń qaıda ekenin anyqtaý úshin jedel-izdestirý sharalaryn júrgizdi. Onyń týǵan-týysqandary, dostary men tanystarynyń meken-jaılary túgel tekserildi. Saqshylar kóshelerdi, aýlalardy, jalǵa beriletin páterler men basqa da qoǵamdyq oryndardy aralady.
«Sonyń nátıjesinde 18 qańtarda tańǵy saǵat 05.00-de joǵalǵan jasóspirim anasynyń úıinen tabyldy. Polıtseıler kámeletke tolmaǵan bala anasynyń úıi mańynda kezekshilik uıymdastyrǵan edi. Tekserý barysynda anyqtalǵany, jasóspirimniń anasy ata-ana quqyǵynan aıyrylǵan, al ákesi qaıtys bolǵan», - dep habarlady vedomstvo ókilderi.
Qazirgi ýaqytta polıtsııa qyzmetkerleri balany «Jasóspirimder úıi» KMM zańdy ókiline tapsyrdy. Olardyń aıtýynsha, bala bul mekemeden buryn da birneshe ret qashqan.
