Óskemende joǵalyp ketken mektep oqýshysy urlaý týraly oqıǵany oıdan shyǵarǵan
ASTANA. QazAqparat - 15 jastaǵy Natalıa Ýgolnıkova úlkenderden qorqyp, polıtsııaǵa urlaý týraly oqıǵany oıdan shyǵarǵanyn moıyndady, dep habarlaıdy YK-news.kz.
19 jeltoqsan kúni jasóspirim qyz mektepke baramyn dep úıden shyǵyp ketken jáne sol kúıi oralmaǵan. Keshe ony polıtsııa qyzmetkerleri izdep tapty. Natasha polıtsııaǵa ózin urlap ketkenin jáne áýejaı aýdanynda belgisiz adamdar ustap otyrǵanyn aıtqan. Biraz ýaqyttan soń, oqýshynyń úlkenderden qoryqqandyqtan, urlaý týraly oqıǵany oıdan shyǵarǵany anyqtaldy.
Natashanyń týystary shyn máninde ony eshkimniń urlamaǵanyn aıtty. Qyzdyń eki táýlik úıde bolmaýynyń sebebi anyqtalyp jatyr. Natalıanyń týystary polıtsııaǵa qyzdyń birneshe ret úıden ketip qalǵanyn aıtqan. Alańdaǵan týystary polıtsııaǵa habar bermesten buryn qyzdy ózderi izdep tabýǵa tyrysqan. Barlyq dostaryna habarlassa da, nátıje shyqpaǵan. Sonymen birge, olar jaqynda qyzdyń ǵalamtordaǵy paraqshasy óshirilip, jańa akkaýnt ashylǵanyn habarlaǵan.
