Óskemende joǵalyp ketken qyz óz úıiniń shatyrynda tyǵylyp otyrǵan
ÓSKEMEN. QazAqparat – Óskemende joǵalyp ketken jasóspirim qyz aman-esen tabyldy. Polıtsııa men Ulttyq ulan qyzmetkerleri júrgizgen izdeý jumystary týra bir táýlikke sozyldy, dep habarlaıdy QazAqparat tilshisi.
Eske sala ketsek, 7 tamyz kúni saǵat 18:30 shamasynda Óskemen qalasynyń Esenberlın kóshesi, 4 «A» mekenjaıynda turatyn, 12 jastaǵy Janerke Qanapııanova úıinen shyǵyp ketip, qaıta oralmaǵany habarlanǵan bolatyn. Ony izdestirý jumystary uıymdastyrylyp, izdeý sharalaryna Óskemen qalalyq Polıtsııa basqarmasynyń jeke quramy men Ulttyq ulannyń 60 áskerı qyzmetkeri jumyldyryldy.
Quqyqqorǵaýshylar men Ulttyq gvardııa qyzmetkerleri Óskemen qalasynyń 19-shy shaǵynaýdanynda izdeý jumystaryn júrgizip, jergilikti turǵyndardan surastyrǵan.
Búgin ShQO Polıtsııa departamentiniń baspasóz qyzmeti qyz bala din aman tabylǵanyn málim etti.
«Jasóspirimdi izdestirý jumystary sátti aıaqtaldy. Ol 8 tamyz kúni keshqurym tabyldy. Qyz balanyń ózi túsindirgendeı, ol osy ýaqytqa deıin ózi turǵan úıiniń shatyrynda tyǵylyp otyrǵan. Anasymen urysyp qalǵannan keıin, úıinen ketip qalǵan. Balany medıtsınalyq qyzmetkerler tekserip, ómirine eshqandaı qaýiptiń týyndap turmaǵanyn anyqtady», - delingen departamenttiń habarlamasynda.
Qazirgi ýaqytta istiń mán-jaıyn Jasóspirimder isi jónindegi polıtsııa tekserip jatyr.
