Óskemende joǵalyp ketken 2 qyz tabyldy
ÓSKEMEN. QazAqparat – Óskemen qalasynda joǵalyp ketken kámelettik jasqa tolmaǵan eki qyz tabyldy, dep habarlaıdy QazAqparat tilshisi.
Jasóspirimder úıiniń tárbıelenýshileri Ananeva Arına Maksımovna men Kabanova Vıktorııa Sergeevna 5 jeltoqsanda saǵat 19.30 shamasynda belgisiz baǵytta shyǵyp ketip, sol kúıi qaıtyp oralmaǵan. Olardy qalalyq polıtsııa basqarmasynyń barlyq jeke quramy izdeýge kirisken bolatyn. Qazir eki qyz da aman-esen tabyldy.
«Eki saǵat buryn kámeletke tolmaǵan eki qyzdyń da qaıda ekendigi anyqtaldy. Vıktorııa Kabanova jasóspirimder úıine óz erkimen qaıtyp keldi. Sálden soń Óskemen qalalyq PB qyzmetkerleri Arına Ananevany tapqan. Alańdaýǵa negiz joq. Tárbıelenýshilermen psıholog jumys júrgizýde. Olardyń ne sebepti ketip qalǵany anyqtalýda. Beı-jaı qaramaı, izdeýge atsalysqan barlyq azamattarǵa alǵys aıtamyn», - dedi ShQO PD bastyǵy Saǵat Mádıev.
Esterińizge sala ketsek, osyǵan deıin Óskemende kámelet jasyna tolmaǵan eki qyzdyń joǵalyp ketkeni habarlanǵan.
