Óskemende joǵalǵan 8 jastaǵy bala qoımada uıyqtap qalǵan
25 qyrkúıek kúni keshke 102 jedel arnasyna jergilikti turǵynnan qońyraý tústi, ol óziniń 8 jastaǵy nemeresin izdep júrgenin aıtyp, kómek surady.
Ájesiniń aıtýynsha, onyń 2014 jyly týǵan nemeresi aýlaǵa shyǵyp, úıine oralmaǵan. Kámeletke tolmaǵan balanyń turǵan jerin anyqtaý maqsatynda dabyl boıynsha jedel-izdestirý toby dereý jınaldy. Tártip saqshylary qandaı da bir aqparatty meńgere alatyn tanystar men kýágerlerden saýalnama alyp, irgeles jatqan aýmaqtardy: gúlzarlardy, saıabaqtardy, jastar jınalatyn oryndardy, dámhanalardy, turǵyn úılerdiń kireberisterin muqııat aralap shyqty.
Menovnoe kentiniń aýmaǵyn tekserý boıynsha jumystar júrgizildi. Іzdeý jumystary jaıaý júrý tártibimen de, qyzmettik avtomashınalardy paıdalaný arqyly da júzege asyryldy. Saıajaı alqaptaryna irgeles jatqan kópqabatty úılerdiń shatyrlary men jertóleleri tekserildi. Joǵalǵan balany izdeýge PB jeke quramynyń 120-dan astam adamy qatysty. Sondaı-aq, izdeýge kórshiler men eriktiler qosyldy.
«Qabyldanǵan sharalardyń nátıjesinde kámeletke tolmaǵan balany Óskemen qalasy PB qyzmetkerleri Arman Mamaev pen Tilek Aıtmuhash jáne Erkejan Jakýpova tapty. Tabylǵan bala aýlada oınaýǵa shyǵyp, keshke deıin oınaǵanyn aıtty. Úıdiń úlkenderi ursady dep oılap, úı janyndaǵy qoımada túneýge sheshim qabyldaǵan. Qazirgi ýaqytta onyń ómiri men densaýlyǵyna eshqandaı qaýip joq. Úıine aman-esen jetkizildi», – dedi Óskemen qalalyq Polıtsııa basqarmasynyń bastyǵy Andreı Mýla.
Tabylǵan balanyń ájesi quqyq qorǵaý organdaryna jáne barlyq qamqorshylarǵa kámeletke tolmaǵan nemeresin izdeýge kómekteskeni úshin úlken alǵys bildiredi.
Foto: polisia.kz