Óskemende joǵalǵan 3 jasar qyz tabyldy
ÓSKEMEN. QazAqparat – Óskemen qalasynda joǵalyp ketken 3 jasar qyz tabyldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, búgin «102» jedel arnasyna qońyraý shalǵan áıel balasynyń joǵalǵanyn aıtty. Óz sózinde ol Vınogradov kóshesindegi jumys ornyna alyp kelgen qyzynyń syrtqa shyǵyp iz-túzsiz ketkenin jetkizgen.
«Tártip saqshylary jedel-izdestirý sharalaryna kiristi. Patrýldik polıtseıler Nurjan Іlııasov pen Vıacheslav Pısıaýkov kóp uzamaı búldirshindi tapty. Anyqtalǵandaı, balabaqsha tárbıeshisi aýlada jalǵyz otyrǵan qyzdy baıqap qalyp, ertip áketken. Balanyń ata-anasy tabylǵansha ony mektepke deıingi mekemedegi óz tobyna qosa turǵan. Barlyq balabaqshany tekserip shyqqan polıtsııa qyzmetkerleri joǵalǵan balanyń qaıda ekenin anyqtady», - delingen habarlamada.
Áıel adam óz kezeginde jyldam áreket etken quqyq qorǵaý organynyń qyzmetkerlerine rızashylyǵyn jetkizdi.
