Óskemende jylý tapshylyǵy máselesi qalaı sheshilmek
ÓSKEMEN. KAZINFORM — Óskemen qalasynda jylý energııasynyń tapshylyǵy 260 gıgakalorııany qurap otyr.
Búginde qala qarqyndy túrde ósip keledi. Alaıda ondaǵan jyl buryn qalyptasqan jylý júıesi shegine jete jumys istep tur. Qurylys jumystary qarqyndy júrgizilip jatqandyqtan másele odan saıyn ýshyǵyp barady.
Tek sońǵy bir jylda Óskemende 200 myń sharshy metrden astam turǵyn úı paıdalanýǵa berilgen. Al jylý qýattarynyń ósimi bul qarqynnan áldeqaıda baıaý. Elektr energııasy jaǵynan úsh iri sý elektr stantsııasynyń arqasynda óńir ózin senimdi sezinse, jylýmen qamtý qalalyq ınfraqurylymnyń eń osal tusy.
Mamandardyń esepteýinshe, qazirgi qurylys qarqyny saqtalǵan jaǵdaıda 2027 jylǵa qaraı jylý energııasynyń tapshylyǵy kúrdeli máselege aınalýy múmkin. Jylytý maýsymynda júıege túsetin júktemeni azaıtý úshin bılik pen energetıkter ınjenerlik sheshim usyndy: qoldanystaǵy eki jylý elektr ortalyǵynyń qýattaryn biriktirý arqyly jylýdy qaıta bólý jáne jaǵdaıdy turaqtandyrý.
Qazirgi tańda qalanyń ár bóliginde ornalasqan eki negizgi JEO jumys isteıdi. Sonyń ishinde Sogra JEO qala mańy men ónerkásiptik nysandy jylýmen qamtamasyz etip, belgili bir rezervtik qýatqa ıe. Osy múmkindikti ortalyqtaǵy aýdandarǵa paıdalaný josparlanyp otyr, ol úshin eki JEO-ny baılanystyratyn jylý jelisin salý qajet.
— Bizde qosymsha jylý energııasyn berýge jáne jańa tutynýshylardy qosýǵa tehnıkalyq múmkindik bar. Qosymsha qazandyq pen týrbına salý kózdelgen, bul stantsııanyń ornatylǵan qýatyn arttyrýǵa múmkindik beredi, — deıdi Sogra JEO dırektory Nurlan Ramazanov.
Eki JEO arasyndaǵy jylý aǵyndaryn qaıta bólý úshin uzyndyǵy 15 shaqyrymǵa deıingi jylý jelilerin tartý josparlanǵan. Magıstral qurylysy bıýdjet qarajaty esebinen júrgizilmek. Bılik bul shara ortalyqtandyrylǵan jylýmen qamtý aımaǵyn keńeıtip, qoldanystaǵy jylý kózderine túsetin salmaqty azaıtady dep úmittenedi.
Eske salsaq, osyǵan deıin Shyǵys Qazaqstan oblysy Rıdder qalasyndaǵy jylý elektr ortalyǵynda 4 qazandyq jáne 1 týrboagregat iske qosylǵany jaıly jazǵanbyz.