Óskemende jyl sońyna deıin 600 ıesiz ıtti aýlaýǵa 16,5 mln teńge bólindi

ÓSKEMEN. KAZINFORM — Óskemende qaraýsyz júrgen janýarlardyń sanyn retteý boıynsha jańa kelisimshart jasaldy. Merdiger uıym 31 jeltoqsanǵa deıin 600 ıtti aýlap, vaktsına salyp, chıpteýge mindettelgen. Bul jumystarǵa bıýdjetten 16,56 mln teńge qarastyrylǵan.

ıt
Foto: Oksana Matasova/Kazinform

Memlekettik satyp alý qujattaryn taldaý nátıjesinde kelisimsharttyń jalpy somasyn josparlanǵan janýarlar sanyna bólgende, bir ıtke júrgiziletin keshendi jumystyń quny 27,6 myń teńgeni quraıtyny belgili boldy. Bul qarajatqa merdiger janýarlardy aýlaý, ýaqytsha ustaý, vaktsınatsııalaý, sáıkestendirý jumystaryn júrgizýge, qujattary tekserilgennen keıin ıesi tabylǵan jaǵdaıda janýardy oǵan qaıtarýǵa mindetti.

Memlekettik satyp alý portalynyń málimetinshe, qyzmet kórsetýshi kompanııa Astana qalasynda tirkelgen. Alaıda tizilimde Óskemen qalasyndaǵy qosymsha mekenjaıy da kórsetilgen.

Sonymen qatar tehnıkalyq tapsyrmada naqtylaýdy qajet etetin eki másele bar. Atap aıtqanda, shyǵyndar smetasynda janýarlardy zararsyzdandyrý jumystary qarastyrylǵanymen, júrgiziletin operatsııalardyń naqty sany kórsetilmegen. Budan bólek, bıýdjettik baǵdarlama tek ıtterdi ǵana emes, qańǵyrǵan mysyqtardy da aýlaýdy kózdeıdi. Alaıda tehnıkalyq tapsyrmada aýlaý jáne zararsyzdandyrý jospary tek 600 ıtke qatysty belgilengen.

Josparlanǵan jumysty osy jyldyń sońyna deıin aıaqtaý úshin merdigerge kún saıyn orta eseppen 8-10 janýardan aýlaýǵa týra keledi. Bul kórsetkish demalys kúnderin de qamtıdy. Kelisimshart talaptaryna sáıkes, jumysqa árqaısysy úsh adamnan turatyn keminde eki mobıldi brıgada jumyldyrylýy tıis. Al qala turǵyndary men uıymdardan túsken ótinimderge jaýap berý ýaqyty 24 saǵattan aspaýy kerek.

Janýarlardy ýaqytsha ustaý oryndaryna qoıylatyn talaptar da qatań belgilengen.

— Ýaqytsha ustaý pýnktinde jaýyn-shashynnan qorǵalǵan, edeni qurǵaq ári jylytylǵan úıshiktermen jabdyqtalǵan keminde 50 voler bolýy qajet. Іri ıtterdiń árqaısysyna 5-6 sharshy metrden kem emes oryn qarastyrylýy tıis. Janýarlardy ustaý merzimi 15 kúnmen shekteledi. Osy ýaqyt ishinde olar azyq-túlikpen, sýmen jáne veterınarııalyq kómekpen qamtamasyz etilýi kerek, — delingen memlekettik satyp alý qujattamasynda.

Jumystyń oryndalýyn baqylaý jáne jalǵan esep berýge jol bermeý maqsatynda merdiger ár kezeńdi fotoǵa túsirýge mindetti, ıaǵnı janýardy kósheden aýlaýdan bastap, veterınarııalyq protsedýralar men volerde ustaýǵa deıingi barlyq jumys tirkelýi tıis. Fotoesepter janýarlardy esepke alý jýrnalymen birge aı saıyn qalalyq turǵyn úı-kommýnaldyq sharýashylyq bólimine tapsyrylýy qajet.

Eske salsaq, buǵan deıin SQO-da ıt-mysyqty ustap-asyraý qaǵıdalary ózgeretinin habarlaǵanbyz.