Óskemende jyl basynan beri 78 adamdy kólik qaǵyp ketken

Óskemen qalasynda bıyl 78 jaıaý júrginshini kólik qaǵyp ketken, dep habarlaıdy Kazinform.

Qalalyq polıtsııa basqarmasynyń málimetine súıensek, jyl basynan beri Óskemende 220 jol-kólik oqıǵasy tirkelgen. Sonyń saldarynan 6 adam kóz jumyp, 265 adam túrli dene jaraqatyn alǵan. 

Sondaı-aq 78 jaıaý júrginshini kólik qaǵyp ketti. Onyń úsheýi kóz jumaǵan. Oqys oqıǵalardyń 80 paıyzy jaıaý júrginshiler ótkelinde tirkeldi. Al qalǵan jaǵdaılarda azamattar joldy ruqsat etilmegen jerden kesip ótken. 

«Jol apattarynyń kóbisi jol qozǵalysy erejelerin óreskel buzýdyń saldarynan bolady. Atap aıtqanda, jol qıylystarynan, jaıaý júrginshiler ótkelinen ótý erejelerin buzý, qashyqtyqty saqtamaý jáne manevr jasaý erejelerin buzý. Sondyqtan júrgizýshilerge jáne jaıaý júrginshilerge barynsha abaı bolý qajettigin eskertemiz», - delingen aqparatta.

Eske salsaq, 14 qarasha kúni Óskemende 3 birdeı oqýshyny kólik qaǵyp ketken bolatyn.