Óskemende jerdiń tońy 1,5 metrge jetken
ÓSKEMEN. QazAqparat - «Qazgıdromet» mekemesi men ShQO tótenshe jaǵdaı departamentiniń mamandary, toń men qardyń qalyńdyǵyn jappaı ólsheýge kiristi. Óskemenniń aýmaǵynda jerdiń tońy 1,5 metr kúıinde, dep habarlaıdy QazAqparat tilshisi.
Shyǵys Qazaqstanda qardyń qalyńdyǵyn ólsheý jumystary qarqyn aldy. Naýryz aıy týǵanymen, ázirge óńirde aýa temperatýrasy tómen tur. Eger kún kúrt jylynar bolsa, munyń sońy aýlalardy sý alýyna ákep soqtyrýy múmkin. Osy sebepti jaýapty mekemeler qar men muzdyń, jer tońynyń qalyńdyǵyn ólsheý sharalaryn jıiletip otyr.
Óskemen qalalyq tótenshe jaǵdaılar basqarmasynyń habarlaýynsha, qala aýmaǵyndaǵy jerdiń tońy 150 santımetrdi qurap otyr. Byltyr osy ýaqytta tońnyń qalyńdyǵy 57 santımetr ǵana bolǵan. Sonyń ózinde jeke sektordaǵy ondaǵan kóshege sý jaıylý qaýpi tóngen.
Tótenshelikter qarý erý maýsymyna daıyndyqty kúzde bastap ketkendikten, shtattyn tys jaǵdaıǵa daıynbyz dep otyr. Merdiger uıymdardyń kúshimen bitelýi múmkin aryqtardyń bári qara kúzde arshylyp, sýaǵarlar tazalanǵan.
«Qazir jylda sý basý qaýpi tónetin aýlalardyń bárine eskertý aqparattary taratylýda. Tasqynǵa qarsy turatyn mekemelerdiń daıyndyǵy da tekseristen ótip jatyr. Birneshe kúnnen keıin TJ basqarmasy táýliktik kezeshilik ornatady. Aýlalardy sý alǵan jaǵdaıda «Óskemen Vodokanal» mekemesinen qosymsha kómek daıyn tur» - delingen basqarma taratqan málimette.
Tońnyń qalyńdyǵyn eskere otyryp, tótenshe jaǵdaı ókilderi Óskemen turǵyndaryn qar erý naýqanyna daıyn bolýǵa shaqyrady. Mamandar aýladaǵy qardy úı irgesinen alysqa tasyp, aryq pen arnalardy qoqystan jáne muzdan ýaqtyly tazartýdy suraıdy.
Dál osyndaı ólsheý jumystary oblystyń basqa aýdandarynda da júrip jatyr. Ondaǵy negizgi maqsat - qar kúıindegi ylǵaldyń naqty mólsherin anyqtaý. Shyǵys óńirlik aeroutqyr jedel qutqarý jasaǵy men «Kazgıdromet» mamandary Zaısan kóliniń salalary men Qara Ertistiń qos alqabynda, Kúrshim aýdanyndaǵy Aqbulaq, Altaı eldi mekenderinde Tarbaǵataı aýdanynyń Kókjyra aýylynda, Zaısan aýdanynyń Daıyr aýylynda qardyń qalyńdyǵyn ólsheý jumystaryn júrgizdi. Onyń nátıjeleri keıin naqtylanbaq.
