Óskemende jer úıden órt shyǵyp, zeınetker kóz jumdy
ÓSKEMEN. QazAqparat – Óskemen qalasynda «Vostochnık-3» saıajaı qoǵamdastyǵyndaǵy jer úıde órt shyqty, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, oqıǵa ornyna órt sóndirýshiler kelip jetkende tilsiz jaý kireberistiń aǵash qurylymdaryn, shatyrdy, esikti, jeke zattar men jıhazdy sharpyp jatty.
Jalyn sharpyǵan aýmaq - 28 sharshy metr.
«Qutqarýshylar úı ishinen 1949 jylǵy ájeniń denesin tapty. Ol ıis tıip kóz jumǵan. Aldyn ala málimet boıynsha órttiń shyǵýyna – elektr jabdyqtaryn montajdaý jáne paıdalaný kezinde órt qaýipsizdigi talaptarynyń saqtalmaýy sebep boldy», - delingen habarlamada.
Aıta keteıik, oblysta 12 men 15 aqpan aralyǵynda jer úılerde 9 órt bolǵan.
