Óskemende jer úıden 28 mln teńge aqsha men zergerlik buıymdardy urlap ketken eki adam ustaldy
ÓSKEMEN. KAZINFORM – Óskemen qalasy turǵynynyń úıinde qomaqty aqsha bar ekenin bilgen urylar yńǵaıly sátin tosyp, tonaýǵa túsken. 28 mln teńge aqsha men zergerlik buıymdardy urlap ketken eki er adamdy polıtseıler ustady.
Tártip saqshylaryna habarlasqan azamat úıin belgisiz bireýlerdiń tonap ketkenin jetkizgen. Jedel izdestirý sharalary barysynda polıtseıler kúdiktilerdi «izin sýytpaı» ustady.
Anyqtalǵandaı, kúdiktilerdiń biri buryn da osyǵan uqsas qylmys jasaǵany úshin sotty bolǵan. Tintý kezinde urlanǵan 28 mln teńge aqsha men zergerlik buıymdar tabyldy. Oǵan qosa kúdiktilerden 1 kelige jýyq gashısh tárkilengen.
«Kúdiktiler jábirlenýshiniń úıinde aqsha bar ekenin bilgen. Ony ańdyp júrip, urlyqqa muqııat daıyndalǵan. Úıden ketkenin kútip, qorshaýdan sekirip ótken. Tereze arqyly ishke kirip, seıftan aqsha men zergerlik buıymdardy alyp ketken», - dep habarlady ShQO Polıtsııa departamentinen.
Eki kúdiktige qatysty urlyq jáne esirtkini zańsyz saqtaý faktileri boıynsha qylmystyq is qozǵaldy. Qazirgi ýaqytta olar ýaqytsha ustaý ızolıatoryna qamaýǵa alynǵan. Tergeý amaldary jalǵasyp jatyr.
Eske salsaq, osyǵan deıin Atyraýda kúdiktiden 200 doza sıntetıkalyq esirtki tárkilengeni habarlanǵan.
