Óskemende jer úıde órt shyǵyp, bir adam qaıtys boldy
ÓSKEMEN. QazAqparat – Óskemen qalasyndaǵy Avrora kóshesinde jer úıde órt shyǵyp, 1 adam kóz jumǵan, dep habarlaıdy QazAqparat.
Qalalyq Tótenshe jaǵdaılar departamenti baspasóz qyzmetiniń habarlaýynsha, búgin saǵat 10.00 shamasynda jeke turǵyn úıdi qyzyl jalyn sharpyǵan. Sol mańaıda kele jatqan polıtsııa qyzmetkerleri órtti baıqap, birden kómekke umtylady. Tártip saqshylary úıden 1930 jylǵy zeınetkerdi syrtqa alyp shyqqan. Alaıda tútinge túnshyqqan ol qaza boldy.
«Oqıǵa ornyna kelip jetken №7 órt sóndirý bólimshesiniń qyzmetkerleri tilsiz jaýdy aýyzdyqtady. Onyń jalpy aýmaǵy 3 sharshy metrdi quraǵan. Órttiń shyǵý sebebi peshti paıdalanǵan kezde qaýipsizdik erejelerin saqtamaýdan bolýy múmkin» delingen vedomstvo málimetinde.
