Óskemende jer silkinse 10 myńǵa jýyq ǵımarat qıraýy múmkin

ÓSKEMEN. KAZINFORM – Óskemen qalasynda jer silkinisiniń yqtımal zardaptaryn baǵalaıtyn qaýipsizdik pasporty jarııalandy. Sol qujatqa sáıkes, 7 balǵa deıingi jer silkinisi kezinde 9 768 ǵımarat qıraýy múmkin.

Qala seısmıkalyq qaýipti aımaqta ornalasqan. Munda 7 balǵa deıingi jer silkinisi qaýpi bar. Budan bólek, seısmıkalyq normalar eskerilmeı salynǵan taǵy 788 nysan qaýip aımaǵynda tur. Onyń ústine Óskemen aýmaǵynda birde-bir statsıonarlyq seısmıkalyq stantsııa tirkelmegen.

ShQO Qurylys basqarmasy jobalyq-smetalyq bóliminiń basshysy Gúlmıra Sátbaevanyń aıtýynsha, oblysta ǵımarattardy bekite túsý boıynsha júıeli jumys júrgizý qajet.

- Kelesi kezeń – turǵyn úılerdi pasporttaý. Qala seısmıkalyq qaýipti aımaq dep tanylǵanǵa deıin salynǵan áleýmettik mańyzy bar nysandar men kópqabatty úılerge erekshe kóńil bólinedi, - deıdi ol.

Osy rette, Tótenshe jaǵdaılar departamenti Shyǵys Qazaqstannyń taýly ólke ekenin eske saldy. Sońǵy eki jylda munda onlaın rejımde jumys isteıtin 12 seısmıkalyq datchık ornatyldy. Barlyq derek avtomatty túrde Almatydaǵy ortalyq observatorııaǵa jiberiledi.

- Seısmıkalyq datchıkter tipti álsiz jer asty dúmpýlerin tirkep, jedel áreket etýge múmkindik beredi, - deıdi TJ aldyn alý basqarmasynyń aǵa ınjeneri Aıaýlym Kekıeva.

Óńirdegi sońǵy qýatty jer silkinisi 1990 jyly Zaısan aýdanynda bolǵan. Ol kezde 9 myńǵa jýyq úı qırady. Jer silkinisiniń oshaǵy Birjan aýylynyń mańynda bolǵan edi.

Eske salsaq, osyǵan deıin Mıanmadaǵy jer silkinisinen qaza tapqandar sany 3,5 myńnan asqany habarlanǵan.