Óskemende jer qoınaýyn zańsyz paıdalanýshylar kóbeıgen
Qalalyq prokýratýra usynǵan málimetine súıensek, Óskemende jer qoınaýyn zańsyz paıdalaný jaǵdaılary tym jıilep ketken.
«Osyndaı zańsyz áreketter qorshaǵan ortaǵa jáne memleket ekonomıkasyna úlken zııan keltirip jatyr. Sondyqtan prokýratýra qyzmetkerleri arnaıy reıdter júrgizdi. Sonyń barysynda jer qoınaýy zańsyz paıdalanylǵan 5 oryn anyqtaldy. Atap aıtqanda, áýejaı aýmaǵynda, Ponton kópiriniń janyndaǵy saıajaı massıvterinde, Jibek matalar kombınatynyń janyndaǵy jańa qurylystarda, Novo-ıAvlenka jáne Sogra kentterinde», - delingen aqparatta.
Búgingi tańda zań buzǵandardyń 3 aýyr júk kóligi polıtsııanyń arnaıy turaǵyna qoıylǵan. 3 adam ákimshilik jaýapkershilikke tartylyp, 1,5 mln teńgeden astam mólsherde aıyppul tóleýge mindetteldi.
«Aldaǵy ýaqytta bul baǵyttaǵy jumystar ýákiletti memlekettik organdarmen ózara is-qımylda jalǵasa bermek. Sonymen qatar, neǵurlym tıimdi jumys isteý úshin jurtshylyqtyń tys qalmaýyn suraımyz. Qala turǵyndarynan belsendi azamattyq ustanym tanytyp, jer qoınaýyn zańsyz paıdalanýshylar týraly aqparat bolǵan jaǵdaıda prokýratýranyń senim telefonyna 8 (7232)-75-86-40 nómiri arqyly habarlasýǵa shaqyramyz», - delingen habarlamada.