Óskemende Jeńis paradyna qatysýshylardy saltanatty túrde qarsy aldy
ÓSKEMEN. KAZINFORM — Búgin Óskemen áýejaıynda Astanada ótken Jeńis paradyna qatysyp qaıtqan shyǵysqazaqstandyq ardagerlerdi saltanatty túrde qarsy alý rásimi ótti.
Ekinshi dúnıejúzilik soǵysynyń kýágerleri men tyl eńbekkerleri, tórt ardager - el tarıhynyń tiri shejiresi. Olar týǵan ólkege oralǵan sátten bastap jerlesteri tarapynan erekshe yqylaspen qarsy alyndy.
Ushaq áýede kele jatqanda-aq, áýe kemesiniń komandıri jolaýshylarǵa ushaqta Jeńis qaharmandary otyrǵanyn habarlady. Bul habar jolaýshylardyń eshqaısysyn beı-jaı qaldyrǵan joq. Sebebi olardyń árqaısysy - uly erliktiń sımvoly, halqymyzdyń ótken tarıhynyń kýágeri.
Óskemen áýejaıynda ardagerlerdi orkestr, gúl shoqtary, qoshemet pen syılyqtarmen qarsy aldy. Keıin árqaısysy qalalar men aýdandarda qurmet kórsetilip, kortejben alyp júrildi - bul shyǵysqazaqstandyqtardyń naǵyz batyrlaryn qarsy alý saltyna aınalǵan dástúr.
– Qurmetti ardagerler men tyl eńbekkerleri! Sizderdi shyn júrekten Jeńis kúnimen quttyqtaımyn! Sizderge alǵysym men sheksiz qurmetimdi bildirý men úshin úlken mártebe. Sizderdeı jandardyń arqasynda biz beıbit aspan astynda ómir súrip, bolashaǵymyzdy quryp, urpaǵymyzdy patrıottyq rýhta tárbıelep kelemiz. Sizderdiń erlikterińiz eshqashan umytylmaıdy, – dedi oblys ákimi Nurymbet Saqtaǵanov.
Paradqa qatysýshylardyń qatarynda – soǵys joldarynan ótken, Lıtva men Belarýsti azat etken, Kenıgsbergti alý shaıqasyna qatysqan Qurmat Rahımuly Rahımov bar. Jeńisten keıin ol Odaq shekarasynda qyzmetin jalǵastyryp, keıin oblystyq ІІB bastyǵynyń orynbasary boldy. Onyń marapattarynyń qatarynda «Jaýyngerlik erligi úshin», «Áskerı eńbegi úshin», «Germanııany jeńgeni úshin» ordenderi men medaldary bar.
Onymen birge tyl eńbekkerleri de bar. Solardyń biri - ıÝrıı Vasılevıch Novolotskıı. Ol nebári alty jasynda fermada jumys istegen. Ushqysh bolýdy armandaǵanymen, qýǵyn-súrginge ushyraǵan otbasynan shyqqany oǵan kedergi boldy. Biraq ol ómir boıy adal eńbek etip, qylmystyq izdestirý salasynda jumys istep, eki ulyn tárbıelep ósirdi.
Kúlzagı Alıhanova – 35 jylyn ustazdyqqa arnaǵan, Orlov mektebiniń aıaýly muǵalimi. Ol bes balanyń ǵana emes, búkil aýyl balalarynyń «ekinshi anasy» atanǵan, bar ǵumyryn bilim men tárbıege arnaǵan jan.
Elena Vladımırovna Stýpak bala kezinen kolhozda jumys istep, keıin Óskemendegi pedagogıkalyq tehnıkýmdy támamdaǵan. Qarapaıym, eńbekqor, rýhy myqty jan - dál osyndaı áıelderdi tyldyń tiregi dep ataǵan.
Olardyń árqaısysy - tarıhtyń bir bólshegi, uly Jeńiske aparǵan joldyń tiri kýási. Búgingi gúl men qoshemet olardyń erligine degen sheksiz rızashylyqtyń bir kórinisi ǵana. Sebebi bolashaq osyndaı jandardyń arqasynda.
Aıta ketelik Almatyda soǵys ardagerlerine arnalǵan 8 alleıa ashylǵan edi.