Óskemende jeńil atletıkadan Qazaqstan kýbogy bastalady
ASTANA. QazAqparat - Erteń, ıaǵnı 10 qańtarda elimizde jeńil atletıkadan 2018 jylǵy Qazaqstan kýbogynyń alǵashqy kezeńi bastalady, dep habarlaıdy QazAqparat QR Jeńil atletıka federatsııasynyń resmı saıtyna silteme jasap.
Atalǵan doda Óskemen qalasyndaǵy jabyq keshende ótedi.
Qazaqstan kýbogy - Halyqaralyq jeńil atletıka federatsııalar qaýymdastyǵynyń (IAAF) erejesi boıynsha ótkiziledi. Kýboktyń reglamenti boıynsha aldymen eki irikteý kezeńi josparlanǵan (10-11 qańtar jáne 16-17 aqpan). Al sheshýshi fınaldyq kezeń 22-23 aqpanda bolady.
Kýboktyń baǵdarlamasyna 13 jekelegen saıys jáne erler men áıelder arasyndaǵy eki komandalyq estafeta engizilgen. Atap aıtsaq, sportshylar 60, 200, 400, 800, 1500, 3000 metrge júgirý, 60 metrge tosqaýyldar arqyly júgirý, 2000 metrge kedergiler arqyly júgirý, bıiktikke sekirý, uzyndyqqa sekirý, syryqpen sekirý, úsh qarǵyp sekirý, ıadro serpý jáne 4h200, 4h400 metrlik estafeta boıynsha saıysqa túsedi.
Іrikteý kezeńinde sportshylarǵa birinshi orynnan segizinshige deıin upaı beriledi: birinshi oryn - 10, ekinshi - 8, úshinshi - 6, tórtinshi - 5, besinshi - 4, altynshy - 3, jetinshi - 2, segizinshi - 1.
Eki kezeńniń qorytyndysy boıynsha 8 úzdik atlet fınalǵa joldama alady. Sóıtip, Qazaqstan kýbogynyń bas júldesine talasady.
Al estafetalyq saıystarda upaı eseptelmeıdi. Tek halyqaralyq jarystarda el namysyn qorǵaıtyn quramany jasaqtaý úshin ótkiziledi.
Fınaldyq kezeńde jarys 32 saıys túrinen ótkiziledi. Qosymsha erlerdiń jetisaıysy men áıelderdiń bessaıysy bar. Іrikteý kezeńindegi upaı eskerilmeıdi.
Qazaqstan kýbogyna basqa eldiń sportshylaryna qatysýǵa bolady, biraq olardyń upaı jınaýǵa múmkindigi joq
