Óskemende jeńil atletıkadan Qazaqstan chempıondary anyqtaldy
ÓSKEMEN. QazAqparat - Óskemende Abaıdyń 175 jyldyǵy aıasynda ótken jeńil atletıkadan Qazaqstan Respýblıkasynyń chempıonaty máresine jetti, dep habarlaıdy QazAqparat.
El chempıonatyna bıyl 260 sportshy qatysty. Ekinshi jarys kúniniń sońynda jeńimpazdar men júldegerlerdi Shyǵys Qazaqstan oblysynyń ákimi, QR jeńil atletıka federatsııasynyń prezıdenti Danıal Ahmetov marapattady.
«Chempıonatta respýblıkalyq deńgeıdegi eki jańa rekord ornatyldy. Atap aıtqanda, Qaraǵandy oblysynyń sportshysy Davıd Efremov 60 m qashyqtyqty kedergiler arqyly 7.64 sek ýaqytta júgirip, 13-15 naýryzda Nankın qalasynda (Qytaı) ótetin álem chempıonatyna qatysý múmkindigine ıe boldy. Sondaı-aq, qostanaılyq sportshy Tatıana Neroznak 3 000 qashyqtyqty 9:16,80 sek ýaqytta júgirip ótip, el rekordyn jańartty», - dedi ShQO Dene shynyqtyrý jáne sport basqarmasynyń baspasóz qyzmeti.
Saıys qorytyndysy boıynsha І oryndy Qaraǵandy oblysynyń sportshylary ıelense, ShQO atletteri ІІ orynǵa ıe boldy. Al Qostanaı oblysynan kelgen qatysýshylar ІІІ orynǵa aıaq tiredi.
Jeńimpazdar men júldegerler ár deńgeıli halyqaralyq jáne álemdik jarystarda el namysyn qorǵamaq. Sonyń ishinde 12-13 aqpanda ótetin Azııa Chempıonatyna qatysý da josparlanǵan.
