Óskemende jel soqpaı, kóshelerdi tútin tumshalaǵanyna 5 kún bolady

ÓSKEMEN. KAZINFORM — Óskemen qalasynda qolaısyz meteorologııalyq jaǵdaı qalyptasqan kúnder taǵy da sozylyp barady.

Qalada turǵyndarǵa kóshede kóp júrmeı, úıde otyrýǵa, terezelerdi ashpaýǵa keńes berilýde. Sebebi qolaısyz meteorologııalyq jaǵdaı qalyptasyp tur. Ol degenimiz, jel soqpaı, zaýyttardan shyqqan gaz qala kóshelerinde shoǵyrlanady.

Jel 27 naýryzdan beri soqpaı keledi. Búgin de kóshelerdi tútin tumshalap tur. Erteń de jaǵdaıdyń ózgermeıtindigi belgili boldy.

— 30 naýryz saǵat 20.00-den bastap 31 naýryz saǵat 20.00-ge deıin Óskemende ekinshi dárejeli qolaısyz meteorologııalyq jaǵdaı saqtalady, — delingen «Qazgıdromet» RMK taratqan aqparatta.

Demek, erteń qalada qolaısyz meteorologııalyq jaǵdaı qalyptasqanyna 5 kún bolady. Buǵan deıin jelsiz kúnder aqpan aıynda jarty aıǵa jýyq ýaqytqa sozylǵan bolatyn.

Eske salsaq, Óskemendi tútin basyp turǵanyna erteń úsh kún bolǵanyn jazǵanbyz.