Óskemende jedel járdem kóligi jol apatyna ushyrap, bir áıel zardap shekti
ÓSKEMEN. QazAqparat – Óskemen qalasynda jedel járdem kóligi jol apatyna tap boldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, búgin, 8 qazanda saǵat 10:30 shamasynda Nazarbaev dańǵyly men Gogol kóshesiniń qıylysynda jedel járdem men VAZ 2110 avtokóligi soqtyǵysqan. Aldyn ala málimetter boıynsha, 36 jastaǵy jedel járdem kóliginiń júrgizýshisi baǵdarshamnyń qyzyl túsi janyp turǵanyna qaramastan óte shyǵyp, 36 jastaǵy er adam tizgindegen jeńil kólikke soǵylǵan.
«Jol-kólik oqıǵasy saldarynan jeńil avtokóliktegi 34 jastaǵy jolaýshy jaraqat alyp, medıtsınalyq mekemege júgindi. Jedel járdem kóliginiń júrgizýshisine qatysty QR ÁQBtK-niń 610-baby 1-bóligi boıynsha ákimshilik hattama toltyryldy», - dep habarlady vedomstvo ókilderi.
