Óskemende jaıaý júrginshiler ótkelinde 62 jastaǵy zeınetkerdi kólik qaǵyp ketti
ÓSKEMEN. QazAqparat – Óskemen qalasynda jaıaý júrginshiler ótkelinen ótip bara jatqan 62 jastaǵy zeınetkerdi kólik qaǵyp ketti, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, jol-kólik oqıǵasy 22 qyrkúıekte saǵat 15:00 shamasynda Nazarbaev dańǵylynda bolǵan.
«VAZ» markaly avtokólikti tizgindep kele jatqan er adam jaıaý júrginshiler ótkelinde 62 jastaǵy zeınetkerdi qaǵyp ketken. Osynyń saldarynan dene jaraqatyn alǵan azamatsha medıtsınalyq mekemege jetkizildi», - dep habarlady vedomstvo ókilderi.
Qazirgi ýaqytta atalǵan fakti boıynsha QR Qylmystyq Kodeksiniń 345-baby 1 -bóligine (abaısyzda densaýlyqqa ortasha zııan keltirgen jol qozǵalysy erejelerin buzý) sáıkes sotqa deıingi tergeý amaldary júrgizilýde.
