Óskemende jaýǵan qar búkil rekordtardy jańartty
ÓSKEMEN. QazAqparat - Óskemende jaýǵan qar búkil rekordtardy jańartty, naýryzdyń alǵashqy bes kúninde jaýyn-shashynnyń aılyq mólsheri jaýdy, dep habarlaıdy QazAqparat tilshisi.
Kóktemniń alǵashqy kúnderi qalyńdyǵy bir metrdeı qar jaýdy. Sınoptıkterdiń málimetinshe, aldaǵy kúnderi de qar jaýady. Túnde jáne kúndiz jaýyn-shashyn bolady, keıbir jerlerde kúsheıedi, jaıaý burqasyn, kóktaıǵaq bolyp, tuman túsedi.
Bul onsyz da táýliktik rejimde istep jatqan kommýnaldyq qyzmetterdiń jumysyn qıyndata túsedi.
«Árıne, basty mindet oryndalyp jatyr. Qoǵamdyq kólik úzilissiz qatynaýda, mashınalar júrip jatyr. «Óskemen - Tártip» osymen besinshi kún táýlik boıy jumysyn toqtatqan joq. Jalpy 98 tehnıka qarmen kúresip jatyr. Qala turǵyndaryna búkil qardy kúrep shyǵarý múmkin emes ekenin aıtqym keledi. Sońǵy kúnderi 2000 tekshe metr qardy shyǵardyq», - deıdi «Óskemen - Tártip» MKK basshysy Tamara Rahymjanova.
Búgin kommýnaldyq sharýashylyqtyń 160 jumysshysy trotýarlardy tazalap, aıaldamalardaǵy qardy qoldyń kúshimen kúrep shyqty.
