Óskemende jastar arasyndaǵy radıkaldy ekstremızmniń aldyn alý máselesi talqylandy
Jastardyń rýhanı-adamgershilik qundylyqtaryn damytýǵa arnalǵan respýblıkalyq semınar-trenıngke Astana, Almaty jáne Shymkent qalalarynan din máselelerin zerteý ortalyqtarynyń dırektorlary, «Nur Múbarak» Egıpet ıslam mádenıeti ýnıversıtetiniń ókilderi qatysty.
Shyǵys Qazaqstan oblysy ákiminiń orynbasary Ásem Núsipova kún tártibindegi qoǵamnyń rýhanı salasyn jan-jaqty qamtıtyn máselege qatysty jumysqa júıeli, ári keshendi qaraý qajettiliginiń mańyzdylyǵyn aıta kele, jıynǵa qatysýshylardyń nazaryn din qyzmetkerleriniń saýattylyǵy men bilim alýyna aýdardy.
Máselen, Shyǵys Qazaqstan oblysynda bul jumys júıeli jolǵa qoıylǵan.
Ásem Núsipovanyń aıtýynsha, 2017 jyly teologtardyń bilimderine jasalǵan taldaý jergilikti din qyzmetkerleriniń sanaýly bóliginde ǵana arnaıy bilimderi baryn anyqtady. Imamdardyń kópshiligi orta bilimmen shektelgen. Sol sebepti oblys ortalyǵyndaǵy Halıfa Altaı meshitiniń negizinde din qyzmetkerlerine arnalyp úsh aılyq kýrstar ashyldy. Bilim berý baǵdarlamasyna dintaný, teologııamen, QR Konstıtýtsııasy men zańdary, memleket tarıhyn oqytý endi. Nátıjesinde 2017 jyly 156, al 2018 jyly 64 ımam bilimderin arttyrdy.
«Bizdiń bilim berý men saýat ashý boıynsha birneshe baǵytymyz bar. Din qyzmetkerleriniń bilimderin jetildirý - solardyń biri. Oblys ákimi Danıal Kenjetaıuly Ahmetovtiń tapsyrmasymen Óskemen jáne Semeı qalalarynda «ımam hatyb», «ıslamtaný» mamandyqtary boıynsha kadr daıarlaýǵa oblystyq bıýdjetten 80 bilim granty bólingen. Jaqyn arada «Nur Múbarak» Egıpet ıslam mádenıeti ýnıversıtetimen yntymaqtastyq jónindegi memorandýmǵa qol qoıamyz», - dedi, Ásem Núsipova.
Munymen qosa, bıylǵy jyl sońyna deıin Halıfa Altaı meshitinde sırek kezdesetin jádigerlerden quralyp, Qazaqstandaǵy ıslam tarıhy jóninde mol maǵlumat beretin Islam mádenıetiniń mýzeıin ashý josparlanyp otyr.
QR Aqparat jáne qoǵamdyq damý mınıstrligi «Din máseleleri jónindegi ǵylymı-zertteý jáne taldaý ortalyǵy» RMM bólim basshysy - Jaras Ahanov pen Qazaqstan musylmandary dinı basqarmasy tóraǵasynyń orynbasary, naıb múftı - Alaý Ádilbaevtardyń baıandamalary semınarǵa qatysýshy qaýymnyń taqyrypqa degen qyzyǵýshylyqtaryn arttyrdy.
Qoǵamdaǵy jastardyń jaýapty mıssııasy týraly Nur-Múbarak Egıpet ıslam mádenıeti ýnıversıtetiniń rektory, professor, ǵylym doktory - Mýhammad ash-Shahhat Abdýlhamıd Mýhammad al-Jındı men QR Ortalyq kommýnıkatsııalar Keńesi janyndaǵy «Mańyzdy» saraptamalyq alańynyń jetekshisi - Nurlan Óteshev keńinen toqtaldy.
Búgingi tańda, Shyǵys Qazaqstan oblysynda 265 myńǵa jýyq jastar bar. Bul oblys turǵyndarynyń 19 paıyzyn quraıdy. Óńirde, oblys ákimi Danıal Ahmetovtyń tapsyrmasymen Jastar jylyn ótkizý boıynsha arnaıy «Jol kartasy» ázirlenip, bekitilgen. 55 tarmaqtan turatyn qujat: turǵyn úı qoljetimdiligin qamtamasyz etý; jumyspen qamtý; talantty jastardy qoldaý; jastardyń ózin-ózi damytýy; jas otbasy, densaýlyq jáne áleýmettik qamtý jáne tirek is-sharalary sııaqty, negizgi bes baǵytttan turady.
