Óskemende jasóspirimder zaqymdap ketken aspaly kópirdi jóndeýge 21 mln teńge jumsalmaq
ÓSKEMEN. KAZINFORM — Óskemen qalasynda jasóspirimder zaqymdap ketken «Samal» saıabaǵy mańyndaǵy aspaly jaıaý júrginshiler kópiri jóndelmek.
Eske salsaq, oqıǵa 7 mamyr kúni keshke bolǵan. Sol kezde kópir ústinde segiz adam bolǵan. Onyń ishindegi tórteýi kámeletke tolmaǵan jasóspirimder.
Olar oıyn barysynda kópirdi terbetkenderin moıyndaǵan. Sonyń saldarynan jaıaý júrginshilerge arnalǵan kópirdiń jabyndysy zaqymdanǵan.
Endi kópirdi jóndeýge bıýdjetten 21 mln teńgeden astam qarajat jumsalmaq. Qazirgi ýaqytta qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi jarııalaǵan baıqaýdy túrkistandyq kompanııa utyp alǵan.
Tehnıkalyq qujattamaǵa sáıkes, jalpy uzyndyǵy 240 metr bolatyn bolat arqandardy, qorshaýlardy aýystyrý, kópir tóseminiń bir bóligin jańartý, jer tósemimen túıisetin tustaryn qalpyna keltirý jáne syrlaý jumystary júrgizilýi tıis.
Osyǵan deıin Atyraýdaǵy tasqynnan búlingen kópirdiń qurylysy uzaqqa sozylyp ketkeni habarlanǵan.
