Óskemende jas jigit Antıkor mańyndaǵy ǵımaratty órtemek boldy

ÓSKEMEN. KAZINFORM — Óskemen qalasynda Antıkor mańyndaǵy ǵımaratty órtemek bolǵan er adam ustaldy.

Oqıǵa búgin qaladaǵy Strelka aýdanynda bolǵan.

QR Sybaılas jemqorlyqqa qarsy is-qımyl agenttiginiń Shyǵys Qazaqstan oblysy boıynsha departamentiniń mańyndaǵy ákimshilik ǵımaratty órtemek bolǵan adam ustaldy.

«Polıtsııa qyzmetkerleri 19 jastaǵy jigitti ustady. Zańbuzýshylyq jasaǵany úshin ol ákimshilik qamaqqa alyndy», — dep habarlady ShQO polıtsııa departamentiniń baspasóz qyzmeti.

Er adamnyń ne sebepti mundaı qadamǵa barmaq bolǵany áli anyqtalǵan joq.

Tártip saqshylary tergeý amaldaryn júrgizip jatyr.

Eske salsaq, osyǵan deıin ShQO-daǵy óndiris ornynan eki adamnyń súıegi tabylǵany habarlanǵan.