Óskemende janarmaı stantsııasyn tonamaq bolǵan er adam 3 jylǵa sottaldy

ÓSKEMEN. KAZINFORM – Óskemen qalasyndaǵy janarmaı quıý beketine benzındi aramen qaraqshylyq shabýyl jasaǵan er adamǵa qatysty sot úkimi shyqty.

Qalalyq №2 sotynda QR Qylmystyq Kodeksiniń 192-baby 1-bóligimen (Qaraqshylyq) is qaraldy. Belgili bolǵandaı, aıyptalýshy qylmystyq áreketin aldyn ala josparlap alǵan.

«2024 jyldyń shilde aıynda ol benzındi ara men kıim satyp alyp, ony jalǵa alǵan páterine tyǵyp qoıǵan. Sodan soń 19 shilde kúni Úlbi jaǵasyna taksımen jetip, kıimin aýystyrady. Abaı-Shákárim dańǵyldarynyń qıylysyndaǵy janarmaı quıý beketine jaıaý baryp, ondaǵy klıentterdiń ketip qalǵanyn tosyp turǵan», - delingen sottyń baspasóz qyzmeti taratqan málimette.

Sáti kelgende betine maska taǵyp, ishki kiredi. Sol kezde ǵımaratta kassır men kúzetshi otyrǵan. Benzındi arany qosqan qaraqshy aqsha talap etken. Kúzetshi oǵan qaraı sýsyndar quıylǵan bankalardy laqtyra jóneledi. Sonyń biri otalyp turǵan benzındi araǵa túsip, ol synyp qalǵannan keıin sottalýshy qasha ketken.

Sot barysynda aıyptalýshy óz kinásin tolyqtaı moıyndap, qatty ókinetinin aıtty. Sot sheshimimen ol kináli dep tanylyp, 3 jylǵa bas bostandyǵynan aıyryldy. Er adam óz jazasyn qaýipsizdigi ortasha túzetý mekemesinde óteıdi. Úkim áli zańdy kúshine engen joq.

Eske salsaq, osyǵan deıin Óskemende júrgizýshi kýáligine emtıhan tapsyrǵandardan 40 mln teńge syıaqy alǵan HQO qyzmetkerleri sottalǵany habarlanǵan.