Óskemende janarmaı quıý stantsııasy mańyndaǵy jarylysqa baılanysty tergeý bastaldy
ÓSKEMEN. QazAqparat – Óskemen qalasyndaǵy janarmaı quıý stantsııasy mańyndaǵy jarylysqa baılanysty tergeý jumystary bastaldy, dep habarlaıdy QazAqparat tilshisi.
Oqıǵa 28 shilde kúni saǵat 08.52-de Óskemendegi Promyshlennaıa kóshesinde ornalasqan JQS aýmaǵynda bolǵan. Janarmaı quıýǵa arnalǵan bóshkelerdi tazalaý kezinde aýa qosyndysy jaryldy.
Sonyń saldarynan 42 jastaǵy er adam kóz jumyp, 12 jastaǵy jetkinshektiń denesin kúıik shaldy. Qazir oqıǵanyń mán-jaıyn polıtsııa qyzmetkerleri anyqtap jatyr.
«Qalalyq PB Úlbi polıtsııa bólimi Qazaqstan Respýblıkasy Qylmystyq Kodeksiniń 156-baby 3-bóligimen (Qaýipsizdik tehnıkasy, ónerkásiptik sanıtarııa qaǵıdalaryn nemese eńbekti qorǵaýdyń ózge de qaǵıdalaryn osy qaǵıdalardy saqtaýdy uıymdastyrý nemese qamtamasyz etý jónindegi mindetter júktelgen adamnyń jasaýy saldarynan abaısyzda adam ólimine ákep soǵý) boıynsha sotqa deıingi tergeý amaldaryn bastady. Tıisti saraptamalar taǵaıyndalǵan», - dep habarlady ShQO PD baspasóz qyzmeti.
Esterińizge sala ketsek, osyǵan deıin Óskemende janarmaı quıý stantsııasy mańynda jarylys bolyp, 1 adam kóz jumǵanyn habarlaǵan edik.
