Óskemende jańa ınfektsııalyq gospıtal ashylady
ÓSKEMEN. QazAqparat – Óskemen qalasynda jańa ınfektsııalyq gospıtal ashylmaq, dep habarlaıdy QazAqparat tilshisi.
ShQO óńirlik kommýnıkatsııalar qyzmetinde ótken baspasóz konferentsııasy barysynda oblystyq Densaýlyq saqtaý basqarmasynyń ókili Asqar Horoshash COVID-19 ınfektsııasynyń taralý qaýpin azaıtý jáne qaýipti dertti juqtyrǵandarmen baılanysta bolǵandardy ýaqtyly izdeý, sondaı-aq olardy oqshaýlaý úshin medıtsınalyq-epıdemııalyq brıgadalar qurylǵanyn aıtty.
«Búginde óńir boıynşa 40 ınfektsııalyq statsıonar daıyndalǵan. Tolyqtaı jabdyqtalǵan 6 myńnan astam tósek-oryn uıymdastyryldy, onyń 399-i reanımatsııalyq. Infektsııalyq statsıonarlarǵa barlyǵy 696 patsıent jatqyzyldy, olardyń 76-sy aýyr, qalǵandary ortasha aýyr halde. Karantın statsıonarlarynda 19 adam jatyr», - dedi ol.
Óskemende úshinshi deńgeıdegi ınfektsııalyq tósek-oryn sanyn arttyrý úshin osy aptada 150 tósektik jańa ınfektsııalyq gospıtal ashý josparlanyp otyr. Bul ǵımaratqa jaqynda kúrdeli jóndeý júrgizilgen.
«Naýqastardy ornalastyrý úshin statsıonarlar jóndeýden ótti. Budan bólek, Óskemendegi oblystyq mamandandyrylǵan medıtsınalyq ortalyqta jáne №4 qalalyq aýrýhanada, Semeıdegi juqpaly aýrýlar aýrýhanasynda, Jarma, Katonqaraǵaı, Ulan, Glýbokoe, Kúrshim jáne Tarbaǵataı aýdandarynyń aýrýhanalarynda jóndeý jumystary júrgizildi», - deıdi Asqar Horoshash.
