Óskemende jańa ınfektsııa bólimi ashylady
ÓSKEMEN. QazAqparat – Óskemen qalasynda qazan aıynyń basynda jańa ınfektsııalyq bólim ashylady, dep habarlaıdy QazAqparat Shyǵys Qazaqstan oblysy ákiminiń baspasóz qyzmetine silteme jasap.
Vedomstvoda pandemııa sebebimen burynǵy jedel járdem aýrýhanasynda kúrdeli jóndeý jumystary qysqa merzimde aıaqtalǵanyn atap ótti. Búginde plastık terezeler men esikter jetkizildi. Gıpsokartonnan daıyndalǵan panelderdi montajdaý jumystary aıaqtalýda. Elektr jaryǵymen jabdyqtaý 95 paıyzǵa, ventılıatsııa úshin aýa ótkizý 75 paıyzǵa oryndalǵan.
«Jóndeý jumystaryn sapaly aıaqtaý óte mańyzdy. Lınoleým tósep, jabdyqtardy ákelip, ornatý, sondaı-aq ǵımarattyń syrtqy bóligin óńdeý jumystaryn aıaqtaý qaldy», - dedi ShQO ákimi Danıal Ahmetov.
Tórtinshi qalalyq aýrýhana fılıalynyń biregeıligi – ondaǵy zertteýdiń keń spektri bolatyn PTR-zerthanalar. Bul statsıonar sondaı-aq mobıldi rentgen apparattarmen jáne kompıýterlik tomografııamen jabdyqtalady. Aýyr jatqan naýqastar úshin 15 tósek-orynǵa arnalǵan jansaqtaý bólimi daıyndalady, onda jasandy tynys alý apparattary, monıtorlar jáne basqa da emdeý-dıagnostıkalyq apparattar qoıylady.
Epıdemıologııalyq jaǵdaı jaqsarǵan soń, ınfektsııalyq bólim Shyǵys Qazaqstan oblysynda tynys alý organdarynyń aýrýlaryn dıagnostıkalaý, aldyn alý jáne emdeýge arnalǵan pýlmonologııalyq ortalyǵy bolady.
