Óskemende jalǵan nómirmen júrip 46 ret jol erejesin buzǵan kólik júrgizýshisi ustaldy
ShQO polıtsııa departamenti baspasóz qyzmetiniń málimetine súıensek, Óskemende tártip saqshylary «Qorǵaý-Sergek» bazasy boıynsha tekserý kezinde jol júrisi qaǵıdasyn birneshe ret buza otyryp, Sátpaev dańǵylynda joǵary jyldamdyqpen júrip kele jatqan «Lexus» markaly avtokólikti baıqaǵan. Sonymen qatar atalǵan kólikte jalpy somasy 2 mln 287 myń teńgege 46 aıyppul salynǵanyn anyqtady.
«Beınebaqylaý kameralarynyń kómegimen Jibek matalar kombınaty yqshamaýdanyndaǵy úılerdiń biriniń aýlasynda memlekettik nómirleri alynǵan osy avtokólik tabyldy. Tekserý barysynda patrýldik polıtsııa batalonynyń qyzmetkerleri qalanyń 29 jastaǵy turǵynyn ustady. Onyń jalǵan memlekettik tirkeý nómirleri bar kólik quralyn basqarǵany anyqtaldy», - delingen aqparatta.
Júrgizýshi QR ÁQBtK-niń 590-baby 2, 3 jáne 4-bólikteri boıynsha ákimshilik jaýapkershilikke tartyldy. Qazirgi ýaqytta materıaldar sotqa joldandy. Kólik arnaıy aıyp turaǵyna qoıylǵan.
