Óskemende zergerlik buıym satýshysy altyndardy ózi jymqyrǵan
ASTANA. QazAqparat - Óskemen qalasynyń iri saýda úıleriniń birindegi býtıkte zergerlik buıymdardy satýshy bolyp jumysqa ornalasqan áıel satýǵa qoıylǵan altyndardy qoldy etkeni úshin zańǵa tartyldy, dep habarlaıdy «QazAqparat» HAA tilshisi.
2016 jyldyń jeltoqsan aıynda 40 jastaǵy sottalýshy «TsÝM» saýda úıine zergerlik buıymdardy satýshy bolyp jumysqa ornalasady. Alaıda adal saýda júrgizýdiń ornyna ol qylmystyq jospar quryp, altyndy qalaısha jasyryn jymqyrýdyń amalyn oılastyrǵan. Osy maqsatta álgi áıel qalanyń ózge núktesindegi «Ánýar» saýda úıinen eki kúmis alqa satyp alyp, altynǵa jalatyp óńdep alady. Al ózi satyp turǵan 60 jáne 90 myńdyq eki alqanyń plombasyn ajyratyp, altynǵa jalatylǵan kúmis alqaǵa jalǵap qoıǵan. Bir qaraǵanda altynnan aýmaıtyn buıymdardy aı saıyn tekserip turatyn revızorlar baıqamaı qalsa kerek.
Sottalýshynyń ekinshi jáne úshinshi qylmystyq áreketi de sátti júzege asady. Al býtıktegi altyn buıymdardy áıel bazarda satyp, túsken aqshany óz paıdasyna jaratqan. Úsh ret jasalǵan qylmystyq áreket jábirlenýshige 2,8 mıllıon teńge shyǵyn keltirgen.
2017 jyldyń sáýir aıynda jumystan shyǵyp ketken sottalýshy Pavlodar qalasyna ketedi. Ol jaqtan jumys tappaı Almatyǵa attanyp bara jatqan jerinen quqyq qorǵaýshylar ony temir jol vokzalynda qolǵa túsirgen.
Sotta jábirlenýshi shyǵynǵa batqanyn, sottalýshynyń shyǵyndy ótemegenin alǵa tartqan. Al aıyptalýshy óz kinásin tolyq moıyndady. №2 Óskemen qalalyq soty is-materıaldaryn zertteı kele sottalýshyny 3 jylǵa bas bostandyǵynan aıyrý týraly úkim shyǵardy. Sondaı-aq, oǵan jábirlenýshiniń shyǵynyn tolyq ótep berý mindetteldi.
