Óskemende zaýyttaǵy 2 jumysshynyń ólimine qatysty arnaıy komıssııa qurylady
ÓSKEMEN. QazAqparat – Óskemen qalasynda kásiporyndaǵy 2 adamnyń ólimine qatysty arnaıy komıssııa qurylady, dep habarlaıdy QazAqparat tilshisi.
ShQO memlekettik eńbek ınspektsııasy basqarmasynyń basshysy Baqytbek Qızatovtyń aıtýynsha, qazirgi ýaqytta kásiporyndaǵy qaıǵyly jaǵdaıǵa qatysty jan-jaqty tekserý júrgizilip jatyr.
«5 qarashada saǵat 17:20 shamasynda «POSUK Titanium» JShS-nyń eki jumysshysy kóz jumdy. Belgili bolǵandaı, olar elektrondy-sáýlelik peshte profılaktıkalyq jóndeý jumystaryn júrgizip jatqan. Sol jerge basqarma mamandary men prokýratýra qyzmetkerleri shuǵyl kelip jetti. Qazirgi ýaqytta oqıǵanyń sebebi men mán-jaıyn anyqtaıtyn arnaıy komıssııa qurylyp jatyr», - dedi ol.
Baqytbek Qızatov óz sózinde osy jyldyń 9 aıynda óńir kásiporyndarynda 153 jazataıym oqıǵa bolyp, 16 adam kóz jumǵanyn jetkizdi.
Esterińizge sala ketsek, osyǵan deıin Óskemende kásiporynda eki jumysshy mert bolǵany habarlanǵan.
