Óskemende zaýytta órt shyqty
ÓSKEMEN. KAZINFORM — Óskemen qalasyndaǵy kondensator zaýytynda órt shyqty.
ShQO Tótenshe jaǵdaılar departamenti baspasóz qyzmetiniń málimetine súıensek, Maldybaev kóshesinde kondensator zaýytynyń aýmaǵynda órt shyqqany týraly habar túsken.
Oqıǵa ornyna órt sóndirýshiler shuǵyl kelip jetti. Sol kezde eki qabatty qoıma ǵımaratynyń shatyry janyp jatqany anyqtaldy.
— Órt sóndirý bólimsheleriniń qyzmetkerleri dereý tilsiz jaýdy aýyzdyqtaý jumystaryna kiristi. Jedel ári úılesimdi áreketterdiń arqasynda qyzyl jalyn tolyqtaı óshirildi. Órttiń jalpy aýmaǵy 720 sharshy metrdi qurady, — dep habarlady vedomstvo ókilderi.
Abyroı bolǵanda, zardap shekken eshkim joq. Órttiń shyǵý sebebi anyqtalyp jatyr.
Eske salsaq, osyǵan deıin Óskemendegi stýdentter jataqhanasynan órt shyqqany habarlanǵan.
