Óskemende zarıadtalyp jatqan telefonnan órt shyǵyp, 20 adam evakýatsııalandy

ÓSKEMEN. QazAqparat – Óskemen qalasynda toǵyz qabatty úıden órt shyǵyp, 20 adam evakýatsııalandy, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, 13 tamyzda Óskemendegi Slavskıı atyndaǵy jaǵalaý kóshesinde ornalasqan toǵyzqabatty úıdiń jetinshi qabatyndaǵy páterde órt shyqty.

Órt sóndirýshiler sol jerge shuǵyl kelip jetti. Podezd ishin kók tútin basqandyqtan 20 adam, onyń ishinde 5 bala evakýatsııalandy.

Abyroı bolǵanda, zardap shekken eshkim joq.

«Páterdi jalyn sharpyǵanda ishte eshkim bolmaǵan. Órttiń shyǵýyna – qýat kózine qosýly qalǵan uıaly telefon sebep boldy. Kóp uzamaı TJD qyzmetkerleri otty tolyqtaı aýyzdyqtady», - delingen aqparatta.

Tilsiz jaýdyń jalpy aýdany 20 sharshy metrdi qurady. Órtpen kúreske jeke quramnan 18 adam jáne 6 tehnıka jumyldyrylǵan.