Óskemende zańsyz saýda dúńgirshekteri jappaı súrilip jatyr
ÓSKEMEN. QazAqparat - Óskemen qalasynyń ákimdigi kóshedegi zańsyz saýda dúńgirshekterin súre bastady, dep habarlaıdy QazAqparat tilshisi.
Alǵash bolyp Ýshanov alańynda turǵan saýda nysany alyndy. Bul dúńgirshektiń qala ákimdigine tıesili jer telimine zańsyz ornatylǵany byltyr kúzde anyqtalǵan bolatyn. Sot onyń ıesine zańsyz áreketi úshin 6,8 mln teńge aıyppul salǵan.
«Nysan ıesi aıyppuldy tólegenmen, dúńgirshekti alyp tastamaǵan. Qala ákimdigine nysandy súrýge týra keldi. Qala boıynsha 200-den astam saýda dúńgirshegi bar. Olardyń qanshalyqty zańǵa sáıkes jumys istep turǵany tekseriletin bolady. Zańsyz dúńgirshektiń bári súriledi. Biraq bul nysan ıelerine saýdamen aınalysýǵa tyıym salynady degen sóz emes. Astana qalasyndaǵy «1000 saýda orny» baǵdarlamasyn biz de basshylyqqa almaqpyz. Kásipkerlerge 20 saýda pavılony aýktsıon arqyly usynylmaq» - delingen ákimdiktiń Feısbýktegi paraqshasynda.
