Óskemende zańsyz taksı qyzmetin kórsetken sheteldik ustaldy
ÓSKEMEN. KAZINFORM — Óskemen qalasynda zańsyz jolaýshy tasymaldap júrgen Ózbekstan azamaty jaýapqa tartyldy.
ShQO Polıtsııa departamenti baspasóz qyzmetiniń málimetine súıensek, tártip saqshylary sheteldik azamatty toqtatqan. Qujattaryn tekserý kezinde júrgizýshi jolaýshylardy mobıldi qosymsha arqyly resmı ruqsatsyz tasymaldaǵany belgili boldy.
— Tekserý barysynda kórshi memlekettiń azamaty Qazaqstanǵa kelgeni jáne ruqsatsyz jeke kóligimen taksı qyzmetimen aınalysqany, sol arqyly kóshi-qon men eńbek zańnamasyn buzǵany anyqtaldy. Atalǵan fakti boıynsha ákimshilik is qozǵalyp, quqyq buzýshy QR ÁQBtK-niń 517-babymen jaýapkershilikke tartyldy. Jınalǵan materıaldy polıtseıler sotqa jiberdi, — delingen aqparatta.
Jyl basynan beri Shyǵys Qazaqstan oblysynda zańsyz jumys istegen 30-dan astam sheteldik azamat anyqtalǵan. Sot sheshimimen olardyń árqaısysyna 25 AEK (98 300 teńge) mólsherinde aıyppul salyndy. Sonymen qatar jumys berýshiler de jaýapqa tartylyp, 30 AEK (117 960 teńge) kóleminde aıyppul arqalady.
Eske salsaq, osyǵan deıin Almatyda zańsyz eńbek mıgranttary ustalǵany habarlanǵan.