Óskemende zańsyz krıptovalıýta saýdasymen aınalysqan adam 2 jarym jylǵa sottaldy

ÓSKEMEN. KAZINFORM — Óskemende zańsyz krıptovalıýta saýdasymen aınalysqan er adam 1 jarym jyldyń ishinde ishinde 144 mln teńgeden astam paıda kórgen.

Qala turǵyny lıtsenzııasyz jumys istep, Binance jáne TotalCoin platformalary arqyly tsıfrlyq aktıvterdi satyp alýmen jáne satýmen aınalysqan. Osylaısha, ol 1,5 jyl ishinde 144 mln teńgeden astam tabys tapqan. 

Óskemen qalalyq № 2 sotynyń málimetine súıensek, aıyptalýshy eki krıptobırjanyń mobıldi qosymshasyn júktep, verıfıkatsııadan ótken. Jalǵan esimdermen tirkelip, klıentterden tapsyrys qabyldaı bastaǵan. Ol operatsııalardy Bitcoin, USDT, Litecoin syndy krıptovalıýtalar arqyly júrgizip, aqshany óziniń jáne tanystarynyń banktik shottarynan sheship otyrdy.

Tergeý barysynda azamattyń Qazaqstanda halyqaralyq «Astana» qarjy ortalyǵynyń sheginen tys jerlerde qamtamasyz etilmegen tsıfrlyq aktıvtermen kez kelgen operatsııa jasaýǵa tyıym salynǵanyn bilgeni anyqtaldy. Soǵan qaramastan aıyptalýshy qyzmetin toqtatpaǵan jáne ony zańdastyrýǵa áreket jasamaǵan.

— Sonymen qatar ol birneshe tanysynan bankte shot ashýdy surap, shynaıy maqsatyn jasyrǵan. Keıin bul shottar arqyly klıentterdiń qarajattary aýdarylyp otyrǵan. Al klıentter operatsııalardyń zańsyz ekeninen múlde beıhabar boldy. Sot sheshimimen aıyptalýshy 2 jyl 6 aı merzimge bostandyǵyn shekteldi, — delingen aqparatta.

Aıta keteıik, sottalýshy bul sheshimmen kelispeı, apellıatsııalyq shaǵym túsirgen. 
Eske salsaq, osyǵan deıin BQO-da áleýmettik jelide bılik ókilin qorqytyp, balaǵattaǵan turǵyn sottalǵany habarlanǵan.