Óskemende voleıboldan klýbtyq Azııa chempıonaty ótedi
ÓSKEMEN. QazAqparat - Shilde aıynda Óskemende áıelder arasyndaǵy klýbtyq Azııa chempıonaty ótedi. Baıraqty básekede el namysyn jergilikti «Altaı» komandasy qorǵaıdy, dep habarlaıdy QazAqparat tilshisi.
Óskemen osymen ekinshi jyl qatarynan klýbtyq Azııa chempıonatyn qabyldamaq. 11-18 shilde aralyǵynda ótetin jarysqa Sary qurlyqtyń eń úzdik degen 10 komandasy qatyspaq.
Qazaqstan atynan el chempıony «Altaı» komandasy synǵa túsedi. Jerebe boıynsha jergilikti «Altaı» qytaılyq Taıbeı, Iran komandalarymen birge «B» tobyna tústi. «A» tobynda Taıland, Japonııa jáne Qytaı elderiniń chempıondary baq synaıdy. Al «S» tobynda Vetnam, Fılıppın, Indonezııa jáne Shrı-Lanka komandalary bar.
Aıta keteıik, ótken jylǵy saıysta «Altaı» komandasy 8 komandanyń ishinde tórtinshi oryn alǵan bolatyn.
