Óskemende úıinen shyǵyp ketken 18 jastaǵy qyz bir apta boıy tabylmaı jatyr
ÓSKEMEN. KAZINFORM – Óskemen qalasynda turatyn 18 jastaǵy qyz úıinen tańerteń shyǵyp ketken. Áli kúnge deıin onyń qaıda ekeni belgisiz.
ShQO polıtsııa departamenti baspasóz qyzmetiniń málimetine súıensek, Ánel Erik 12 qarasha kúni tańerteń qaladaǵy Metallýrg saıabaǵynyń mańyndaǵy úıinen shyǵyp ketken. Qaıda ketkenin aıtpaǵan ol sol kúni habar-osharsyz.
Ata-anasy sol kúni polıtsııaǵa habarlasyp, kómek suraǵan soń tártip saqshylary men eriktiler jedel-izdestirý sharalaryna kirisken. Alaıda arada bir apta ótse de 18 jastaǵy qyz tabylmaı jatyr.
«Boıjetkenniń ústinde qara fýtbolka, jasyl jeıde, qara shalbar jáne etik bolǵan. Ózimen birge uıaly telefonyn ala shyǵypty. Biraq sol kúnnen beri óshirýli tur. Ánel Eriktiń qaıda ekendigi týraly qandaı da bir aqparat biletin adamǵa 102 arnasyna qońyraý shalýyn suraımyz», - delingen aqparatta.
Eske salsaq, Pavlodarda 83 jastaǵy qart adam joǵalyp ketkeni habarlanǵan.
