Óskemende úıinen qashqan 8-synyp oqýshysy Almatyda turmysqa shyǵyp ketken
ÓSKEMEN. QazAqparat - Shyǵys Qazaqstanda úıinen qashqan jetkinshek qyz Almatyda turmysqa shyǵyp ketken, dep habarlaıdy QazAqparat.
Oblystyq PD baspasóz qyzmeti málim etkendeı, Óskemende 48 jastaǵy áıel qyrkúıekte qalalyq polıtsııa basqarmasyna habarlasyp, kámeletke tolmaǵan qyzynyń joǵalǵanyn jetkizgen.
Onyń 8-synypta oqıtyn qyzy maýsym aıynyń sońynda úıden ketip qalǵan. Áıel qyzdy Almatydan taýyp, úıine alyp kelýge bel býǵan.
Qaladan shyǵar aldynda janarmaı beketine toqtaǵan sátte onyń qyzy qaıtadan qashyp ketken.
19 qyrkúıekte jedel-izdestirý sharalaryn júrgizý barysynda ShQO PD krımınaldyq polıtsııa qyzmetkerleri Almatydan jasóspirim qyzdy tapqan.
Onymen sóılesken jedel ýákilder onyń úıden óz erkimen ketkenin anyqtaǵan.
Ol Almatyda ómir súrgisi kelip, syǵandar dástúri boıynsha turmysqa shyǵyp ketken. Tártip saqshylary ony ata-anasynyń úıine qaıtardy.
Osy qyrkúıekte polıtsııa taǵy bir kámeletke tolmaǵan adamdy tapty.
Tamyz aıynda Semeı qalasynyń polıtsııa basqarmasyna 20 jastaǵy jas jigit 17 jastaǵy qaryndasy 17 tamyz kúni tańerteń úıden shyǵyp, sodan keıin oralmaǵanyn habarlaǵan.
Qyzdyń qaltasyndaǵy uıaly telefon sóndirýli bolǵan.
20 qyrkúıek kúni krımınaldyq polıtsııa qyzmetkerleri ony Nur-Sultan qalasynan tapty. Boıjetken jumysqa ornalasýǵa nıettenip júrgen.
Eske sala keteıik, keshe Semeıde turatyn 14 jasar qyzdyń «VKontakte» áleýmettik jelisi arqyly kórshi qalada turatyn jigitpen tanysyp, onymen kezdesý úshin úıinen qashyp ketkenin jazǵan bolatynbyz.
Jasóspirim tártip saqshylaryna úıden óz erkimen ketkenin aıtqan, onyń sebebi - ata-anasymen birge turǵysy kelmeıdi.
