Óskemende úıinde iri kólemde marıhýana saqtaǵan er adam májbúrli eńbekke tartyldy

ÓSKEMEN. QazAqparat – Óskemen qalasynda úıinde iri kólemde marıhýana saqtaǵan er adam 100 saǵattyq májbúrli eńbekke tartyldy, dep habarlaıdy QazAqparat tilshisi.

ShQO QAJ departamenti baspasóz qyzmetiniń málimetine súıensek, er adamnan ósimdik tektes zat salynǵan paket tárkilendi. Saraptama nátıjesinde bul zattyń gashısh ekeni anyqtalǵan.

Sonymen qatar onyń úıin tintý barysynda tósek astynan iri mólsherde keptirilgen marıhýana tabyldy. Sottalýshy birrettik 25 dozany satý maqsatynsyz, jeke paıdalaný úshin saqtaǵan. Sot otyrysynda Óskemen turǵyny óz kinásin moıyndady.

«Qalalyq №2 soty 51 jastaǵy azamatty QR Qylmystyq Kodeksiniń 296-baby 3-bóligine sáıkes kináli dep taýyp, júz saǵattyq májbúrli qoǵamdyq jumysqa tartty. Er adam Óskemen qalasynyń Soljaǵalaý aýdandyq probatsııa qyzmetine esepke qoıyldy. Endi ol qoǵamdyq oryndardy, atap aıtqanda aıaldamalardy, aýlalardy jáne saıabaqtardy qoqystan tazalaıtyn bolady», - dedi Soljaǵalaý aýdandyq probatsııa qyzmetiniń bastyǵy Baýyrjan Tóleýhanov.