Óskemende úı qyzmetshisi seıften urlaǵan 61 mln teńgege toı jasap, páter alǵan
ShQO polıtsııa departamenti baspasóz qyzmetiniń málimetine súıensek, 35 jastaǵy qala turǵyny «102» jedel arnasyna habarlasyp, úıindegi seıfte turǵan 130 000 AQSh dollary joǵalǵanyn jetkizdi. Bul 61 100 000 teńgege teń.
Tártip saqshylary kóp uzamaı kúdiktini anyqtady. Ol jábirlenýshiniń úıinde qyzmetshi bolyp jumys istegen 21 jastaǵy qyz bolyp shyqty.
«Kúdiktiniń aıtýynsha, ol tamyz aıynyń basynda seıften alǵash 10 000 AQSh dollaryn urlaǵan. Sol aqshaǵa shetelge baryp demalyp kelgen. Demalystan oralǵan qyz úı ıeleri aqshanyń joǵalǵanyn múlde baıqamaǵanyn kórdi. Sóıtip, eshteńe bolmaǵandaı sol úıde jumysyn jalǵastyra bergen», - delingen aqparatta.
Bir aıdyń ishinde ol seıften 130 000 AQSh dollaryn qoldy qyldy. Bul aqshaǵa uzatý toıyn jasap, páter jáne kólik satyp alǵan. Qazirgi ýaqytta kúdikti ýaqytsha ustaý ızolıatoryna qamaldy. Atalǵan fakti boıynsha QR QK-niń 188-baby 4-bóligine (Іri kólemde jasalǵan urlyq) sáıkes sotqa deıingi tergeý amaldary bastaldy.
Foto: polisia.kz