Óskemende úshinshi qabattaǵy balkon qırap, áıel adam jerge qulap tústi

ÓSKEMEN. QazAqparat – Óskemen qalasynda úshinshi qabattaǵy balkon qırap, áıel adam jerge qulap tústi, dep habarlaıdy QazAqparat tilshisi.

Oqıǵa 18 mamyr kúni saǵat 15:30 shamasynda Qazaqstan kóshesinde ornalasqan kópqabatty turǵyn úıde bolǵan. Úshinshi qabattaǵy balkon kenetten qırap túsip, sol ýaqytta balkonda turǵan áıel jerge qulaǵan.

Abyroı bolǵanda, ol aman qaldy. Belgili bolǵandaı, sol sátte úıde qarshadaı bala qaraýsyz qalǵan.

«Zardap shekken áıeldi jedel járdem qyzmetkerleri shuǵyl túrde aýrýhanaǵa jetkizdi. Al balany oqıǵa ornyna jetken týystary alyp ketti. Qazir áıeldiń jaǵdaıy jaqsy, ol tekserýden ótip jatyr. Denesinde synyq nemese basqa da aýyr jaraqattar joq», - dep habarlady ShQO Densaýlyq saqtaý basqarmasynyń baspasóz qyzmeti.
Foto - oqıǵa kýágerlerinen