Óskemende úsh kún qatarynan sol jaǵalaýdaǵy myńdaǵan turǵyn jaryqsyz qaldy
ÓSKEMEN. KAZINFORM – Óskemen qalasyndaǵy Jibek matalar kombınaty shaǵyn aýdany qaıtadan elektr energııasynsyz qaldy. Munda jaryq úshinshi kún qatarynan óship otyr.
Jaryq búgin saǵat 10:30 shamasynda óshken. Turǵyndardyń aıtýynsha, elektr qýaty esh eskertýsiz sóndirilip, keminde úsh saǵat boıy qosylmaǵan. Apattardyń saldarynan turmystyq tehnıka jıi isten shyǵyp, kúndelikti tirshilik qıyndap ketken.
- Jaryqtyń óshiýi úshinshi kún qatarynan qaıtalandy. Jaryqty eskertýsiz óshiredi. Birneshe saǵat boıy jaryqsyz otyramyz. Balalarǵa tamaq daıyndaý da, kir jýý da múmkin emes. Sý da toqtaıdy. Óıtkeni nasos jumys istemeı qalady. Tehnıkalar da isten shyǵa bastady, - deıdi shaǵyn aýdan turǵyndary.
«BESK» kompanııasy baspasóz qyzmetiniń málimetinshe, kezekti óshirýge jabdyqtyń apatty jóndeýge shyǵarylýy sebep bolǵan.
- 13 sáýir kúni Óskemende L-27 jelisinde elektr energııasy apatty jaǵdaıda óshirildi. Sebebi «KShT» qosalqy stantsııasyndaǵy sektsııa apatty jóndeýge shyǵaryldy. Shamamen 2300 abonent jaryqsyz otyr. Aqaýdy joıý úshin jedel brıgada jumys istep jatyr, - delingen habarlamada.
Eske salsaq, osyǵan deıin Óskemende 5 myńǵa jýyq abonent jaryqsyz qalǵany habarlanǵan.
