Óskemende úsh kún qatarynan aýadaǵy kúkirt dıoksıdiniń mólsheri shekti deńgeıden asyp otyr
ÓSKEMEN. KAZINFORM — Óskemen qalasynda aýadaǵy kúkirt dıoksıdiniń ruqsat etilgen shekti mólsherden asýy úshinshi kún qatarynan tirkelip otyr.
«Qazgıdromet» RMK málimetine sáıkes, lastaýshy zattardyń eń joǵary kórsetkishi 14 qarashada tirkelgen. Sol kúni kúkirt dıoksıdiniń bir rettik eń joǵary kontsentratsııasy ruqsat etilgen shekten 1,87 ese asyp ketkeni anyqtaldy. Sondaı-aq aýa quramyndaǵy kúkirtsýteginiń mólsheri de 1,7 ese artqan.
Keıingi kúnderi jaǵdaı birshama turaqtalǵanymen, zııandy zattardyń kontsentratsııasy qalypty deńgeıge túsken joq.
— 15 qarashada kúkirt dıoksıdiniń mólsheri 1,12 ese, 16 qarashada 1,65 ese artty, — delingen aqparatta.
Sınoptıkterdiń boljamynsha, 17 qarashada da qalada qolaısyz aýa raıy saqtalady. Tuman túskenimen jaýyn-shashyn bolmaıdy. Jeldiń jyldamdyǵy sekýndyna 1-6 metr shamasynda bolady dep kútiledi. Mundaı meteorologııalyq jaǵdaılar zııandy shyǵaryndylardyń atmosferanyń jerge jaqyn qabatynda taralmaı, jınalýyna yqpal etedi.
Aıta keteıik, lastaýshy zattar mólsheriniń úsh kún qatarynan belgilengen normatıvten asyp, aýanyń lastaný deńgeıi joǵary bolatyny boljanǵanyna qaramastan, «Qazgıdromet» QMJ-nyń birinshi, ekinshi nemese úshinshi dárejesi boıynsha resmı eskertý jarııalamaǵan.
Bul iri ónerkásiptik kásiporyndardyń ázirge shyǵaryndylar kólemin qysqartý rejımine kóshýge mindetti emes ekenin bildiredi. Óıtkeni mundaı sharalar meteorologııalyq qyzmetten daýyldy eskertý alynǵan jaǵdaıda ǵana iske qosylady.
Eske salsaq, osyǵan deıin Óskemende ekologııalyq pasportty ázirleý bes jylǵa kesheýildegeni habarlanǵan.