Óskemende ury bir kúnde bir aýladan birneshe kólikti qatarynan tonap ketken
ÓSKEMEN. QazAqparat – Óskemende ury bir kúnde bir aýladan birneshe kólikti tonap ketken. Bul týraly Óskemen qalalyq polıtsııa basqarmasynyń baspasóz qyzmeti habarlady.
Baspasóz málimetterine qaraǵanda, Óskemen qalasy Polıtsııa basqarmasynyń «102» arnasyna bir kúnde birneshe adam habarlasyp, aýlalarynda turǵan kólikteriniń tonalǵanyn aıtyp shaǵymdanǵan. Barlyq derek boıynsha qylmystyq áreket bir tásilmen, ıaǵnı kólik quralynyń terezesin syndyrý nemese kilt tańdap ashý arqyly júzege asyrylǵan.
Qońyraýlardy qabyldaǵannan keıin Óskemen qalalyq polıtsııa basqarmasynyń Úlbi polıtsııa bóliminiń qyzmetkerleri dereý izge túsip, sol kúni taǵy bir jymysqy áreketin iske asyrmaq bolǵan uryny qolǵa túsirdi.
Bespalov kóshesindegi bir úıdiń aýlasynda turǵan sheteldik avtokóliktiń oń jaq áınegin syndyryp, ishindegi múlikti tonamaq bolǵan qaraqshy tártip saqshylary ustap aldy.
«Tekserý barysynda 38 jasar kúdiktiniń buryn da isti bolǵany anyqtalyp, tergeý aıasynda sol kúni jasalǵan barlyq urlyq isteri aıǵaqtalady. Qazirgi ýaqytta kúdikti ýaqytsha ustaý ızolıatoryna toǵytylyp, oǵan qatysty Qazaqstan Respýblıkasy Qylmystyq Kodeksiniń 188 baby boıynsha sotqa deıingi tergeý amaldary bastalyp ketti»,-dedi Óskemen qalasy Polıtsııa basqarmasy Úlbi polıtsııa bólimi bastyǵynyń orynbasary Raýan Baıseıitov.
«Beıbit kúnde qarapaıym qala turǵyndaryna shyǵyn keltirgen qaraqshy osylaı qolǵa túsip, aldaǵy ýaqytta zań aldynda jaýap beretin bolady. Polıtsııa basqarmasy turǵyndarǵa jáne qala qonaqtaryna jeke múlikterine asa muqııat bolýlaryn taǵy bir márte eskertedi»,-delingen habarlamada.
