Óskemende úlken tennısten halyqaralyq doda bastaldy
ÓSKEMEN. QazAqparat - Óskemende úlken tennısten World tennis tour M25 Ust-Kamenogorsk halyqaralyq jarysy bastaldy. ITF baǵdarlamasyna enetin aıtýly doda Shyǵys jerinde tuńǵysh ret jalaýyn jelbiretip otyr, dep habarlaıdy QazAqparat Altaınıýs saıtyna silteme jasap.
Bir aptaǵa sozylatyn jarysta Qazaqstannyń, sonymen qatar AQSh, Belarýs, Izraıl, Lıtva, Ózbekstan, Polsha, Reseı, Serbııa, Shvetsııa sııaqty 10-ǵa jýyq eldiń kásipqoı tennısshileri baq synaıtyn bolady. Aralarynda tennıs súıer qaýymǵa esimderi jaqsy tanys raketkalar da bar. Máselen, tájirıbeli reseılik tennısshi Konstantın Kravchýk «Chellendjer» serııasy aıasyndaǵy úsh týrnırde top jaryp, kezinde álemniń úzdik 100 oıynshysy qataryna engen-di. Sol sııaqty ızraıldik Edan Leshem men reseılik Bogdan Bobrov ta birshama jetistikke jetip úlgergen raketkalar sanalady. Óskemendegi týrnırde dál osyndaı saqa sportshylarǵa bizdiń eldiń tennısshileri de qarsylas atanbaq.
Belgili bolǵandaı, týrnır aldynda jarys kezdesýleri ótetin «Smash» tennıs ortalyǵynda kúrdeli jóndeý jumystary júrgizildi. Atap aıtqanda, mundaǵy korttardyń jabyndysy jańalanǵan.
Óskemendegi tennıs korttarynyń sapasyna sheteldik sportshylar da joǵary baǵa berýde. Soladyń biri – shvetsııalyq Nıklas Iohansson.
«Shyny kerek, buǵan deıin Óskemen qalasy jaıynda estip kórmeppin. Búgin alystaǵy Qazaqstannyń bir túkpirinde de osyndaı keremet tennıs ortalyǵy, zamanaýı korttar bar ekenin kórip, tańdanysymdy jasyra almaı otyrmyn. Mundaı jerde oınaýdyń ózi bir ǵanıbet», – deıdi sheteldik tennısshi.
Jarystarǵa kirip, tamashalaý – tegin. Tennıs dodasy 31 tamyzǵa deıin jalǵasady.
