Óskemende úleskerlerden 1,8 mlrd teńge alǵan qurylys kompanııalarynyń basshylary sottaldy
ÓSKEMEN.KAZINFORM – Óskemen qalasynda úleskerlerdi aldap soqqan qurylys kompanııalarynyń 2 basshysyna qatysty sot úkimi shyqty.
Qalalyq №2 soty baspasóz qyzmetiniń málimetinshe, 2021-2024 jyldary aralyǵynda aıyptalýshylar turǵyn úı kesheniniń qurylysyna ruqsat qaǵazdary bolmasa da páter satý týraly jarnamalar jarııalaǵan. Azamattardan aqsha alý úshin túrli aktsııalar da uıymdastyrǵan.
- Halyqty úı alýǵa qyzyqtyrý úshin jeńildikter usynyp, utys oıyndaryn ótkizgen. Adamdarmen úıdi brondaý týraly kelisimsharttar jasasqan. Alaıda bul qujattar úlestik qatysý sharttary bolyp sanalmaıdy jáne azamattarǵa turǵyn úı alý quqyǵyn bermeıdi, - delingen aqparatta.
2 aıyptalýshynyń zańsyz áreketinen 103 adam zardap shekti. Materıaldyq shyǵyn kólemi 1 mlrd 800 mln teńgeden asqan. Sot jábirlenýshilerdiń azamattyq talap-aryzdaryn tolyq qanaǵattandyrdy.
- Bir aıyptalýshy 7 jylǵa, ekinshisi 6 jylǵa bas bostandyǵynan aıyryldy. Ekeýine de 10 jyl boıy qurylys salasynda jumys isteýge tyıym salyndy. Úkim áli zańdy kúshine engen joq, - delingen habarlamada.
Eske salsaq, osyǵan deıin Óskemen turǵyndary men polıtseılerden aqsha bopsalaǵan bloger 4 jylǵa túrmege qamalǵany habarlanǵan.