Óskemende Úlbi ózenindegi sý deńgeıi kóterildi
ÓSKEMEN. QazAqparat – Óskemen qalasynda Úlbi ózenindegi sý deńgeıi kóterildi, dep habarlaıdy QazAqparat tilshisi.
Qalalyq Tótenshe jaǵdaılar departamenti baspasóz qyzmetiniń málimetine súıensek, Úlbi ózeninde sý deńgeıiniń kóterilýine baılanysty qutqarýshylar men jergilikti ákimdik qyzmetkerleri Sogra kentiniń turǵyndaryna túsindirý jumysyn júrgizýde.
Kúndelikti baqylaý jasaıtyn mamandardyń dereginshe, qazirgi ýaqytta atalǵan ózenniń deńgeıi - 6,19 metr. Sońǵy táýlikte sý 13 santımetrge kóterilgen.
«Sý deńgeıi áli qaýipti shegine jetken joq. Jaǵdaı turaqty. Dese de turǵyndardyń saqtyq sharalaryn qabyldaǵany durys», - dep habarlady vedomstvo ókilderi.
Aıta keteıik, sý deńgeıi 8 metrge jetse, sol mańaıdaǵy eldi mekenderdi sý basý qaýpi týyndaýy múmkin.
