Óskemende tyıym salynǵan dinı kitaptardy satqan áıel 153 myń teńge aıyppul tóleıdi

ÓSKEMEN. QazAqparat – Óskemen qalasynda tyıym salynǵan dinı kitaptardy satqan áıel jaýapqa tartyldy, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, tártip saqshylary Óskemendegi gazet dúńgirshekteriniń birinde Qazaqstan aýmaǵynda tyıym salynǵan dinı ádebıetter men atrıbýttardy satý faktisin anyqtaǵan.

«50 jastaǵy áıel adam ustalyp, odan 12 kitap tárkilendi. Qalalyq ákimshilik sotynyń sheshimimen oǵan QR ÁQBtK-niń 490-baby 1-bóligine sáıkes dinı kitaptardy jergilikti atqarýshy organdardyń tıisti ruqsatynsyz belgilenbegen jerde satqany úshin 50 AEK mólsherinde aıyppul salyndy», - delingen aqparatta.

Aıta keteıik, zań boıynsha tyıym salynǵan dinı kitaptardy satqan jeke tulǵalarǵa – 50 AEK, al zańdy tulǵalarǵa – 200 AEK mólsherinde aıyppul qarastyrylǵan.